Sa hulagway nga napublikar kagahapon dinhi sa Banat News, makita ang lima ka kawani sa CITOM Engineering Section nga nagtinapolan. Buntag pa gani, alas nueve pa sa buntag kaniadto’ng Miyerkules, diha na sila daplin sa karsada nanglingkod ug nagsultihanay lang.
Walay init sa mao nga higayon ug dili sila makapangatarungan nga nagpasilong sila kay dili na maantos ang kainit. Ang kaligoy ra g’yud ang nagsugo.
Wala gayud sila mauwaw nga ang mga tawo nga moagi sa gitrabahoan nila sa Gorordo Avenue dapit sa eskena Perpetual Soccour motan-aw kanila ug nakasaway sa ilang gihimo.
Matag agi nako sa mao nga dapit, ingon gayud niini ang akong makita nga anaa sila sa daplin. Wala lang dayon ko makakuha og hulagway kanila kay magdagan man ang sakyanan nga akong gisakyan.
Apan kaniadto’ng Miyerkules giswerte ko kay “stop signal†ang traffic light mao nga nakahigayon ko sa pagkuha og hulagway kanila.
Ang akong mensahe sa mao nga mga kawani, wala ko’y tinguha nga pasilotan kamo. Ang ako lang tumong mao nga masayod kamo sa inyong sayop nga nahimo.
Angay kamo nga masayod nga daghang mga magbubuhis ang nagbantay sa inyong mga lihok. Mao diay nga pwerte’ng dugaya na kanang inyong gitrabaho ug wala pa mahuman kay nagtinapolan man kamo.
Ikauwaw ninyo ang inyong gihimo. Kun himuon pa ninyo ang katapolan nga magsigi lang og pahuway, awhagon nako ang kadagkoan sa CITOM ug City Hall nga kamo pangtaktakon sa katungdanan.
Gibalik-balik g’yud ni Mayor Michael Rama nga kontra niya ang mga tawo nga tapolan. Sa ato pa, kamo nga mga ligoy nga kawani dili angay sa panerbisyo sa kagamhanan.
* * *
Kini’ng namaligya og pagkaon nga migamit og multi-cab isip ilang tindahan ug nagpahimutang unahan sa PC Hills diha sa Sitio Maracas, Lahug, kanunay nga gibadlong sa CITOM.
Ang rason, gigamit nila ang karsada sa ilang pagpaninda. Wala tingali sila makabasa sa jurisprudence sa Supreme Court. “Roads are beyond the commerce of man.â€
Gawas nga miabuso sila, ang ilang mga hinugas, dala ang mga mumho, anha ra iyabo sa karsada nga nagdala og kahugaw.
Dili kana maayo.