Kinsa diay ang mipakanaug og order alang sa parole ni kanhi gobernador Antonio Leviste?
Nangutana si Pres. Aquino tungod kay wa siya masayud kinsay naghatag og mando aron hatagan og kagawasan sa pagkapriso si Leviste.
Sa nasayran ang bugtong makahatag og mando paghatag og parole sa usa ka piniriso mao ang pamuno nasud.
Kun wa siya kapirma og order, tataw kaayo nga may nagluib kaniya pinaagi kaha sa pagsukip sa ngan ni Leviste didto sa listahan sa angay hatagan og kagawasan.
Apan buot bang ipasabot nga wa reviewha sa presidente ang maong lista una siya mopirma sa rekomendasyon sa hataganan og parole?
Busa angay lang nga imbistigahon ang maong isyu kay murag may tawo nga milingla sa nasud aron pakasad-on ang presidente sa kagawasan ni Leviste.
Tingale di pa angay nga hatagan og kagawasan si Leviste busa nakahukom ang pamuno nasud nga iyang sukiton ang nagrekomendar sa mga binilanggo nga hatagan og parole.
Kun masuta sa presidente nga gilipat siya busa nakapirma siya sa parole order ni Leviste, unsa kaha’y iyang buhaton niadtong opisyal nga milimbong kaniya?
Sayon ra ba diay lipaton ang pamuno nasud ug nganong gibuhat man kini sa nagpasiugda, aron ba pit-on ang presidente sa maong isyu?