Dilikado nga mag-atubang og problema sa Commission On Elections sila si Mayor Michael Rama ug ang iyang ig-agaw nga si Annabelle.
Kini tungod sa wala magtugma nga kantidad sa ilang gasto sa miagi nga eleksyon basi sa ilang Statement of Election Contributions and Expenditures kon SECE.
Si Rama mideklarar lang og P1.2 milyones nga gasto samtang si Annabelle miingon nga kapin lang sa P500 mil ang iyang gasto.
Pero samtang ingon lang niini kagamay ang ilang gideklarar, nabisto ang ilang pagpamakak tungod sa ilang panag-away.
Nasuko man gud si Annabelle ngadto sa mayor tungod kay mao ni iyang gibasol nganong napildi siya sa miaging eleksyon.
Matud ni Annabelle nga gium-um sa mayor ang P3 million nga iyang gihatag. Wala kuno ibayad alang sa iyang watchers ang kwarta nga iyang gihatag.
Nunot niini buot niyang bawion ang maong kantidad gikan sa mayor. Kun matud ni Annabelle nihatag siya og P3 million aron isweldo sa watchers, nganong wala ni malakip sa iyang SECE?
Kun pananglitan donation ang maong kantidad, nganong wala ni ideklarar ni Mike Rama sa iyang SECE?
Tataw nga dunay namakak nilang duha. Hinaut dili ni palabyon sa COMELEC ug sigurohon nga dunay manubag nila sa balaud.
Mahulog nga kataw-anan ang Comelec kun bisan sa pag-angkon ni Annabelle wala silay mahimo.
* * *
Ting-uwan na sab og uso na sab ang baha. Gani sa miaging gabii miabot og hapit taga-liog ang baha sa pipila ka dapit sa dakbayan.
Matud sa city disaster nga miabot og kutob sa abaga ang gitas-on sa tubig didto sa Mahiga area sa north reclamation area.
Ang akong gikuyawan mao ang posibli nga mga pagdahili sa yuta labi pa sa mga landslide prone area.
Usa sa akong gikuyawan mao ang mga palibot nga sitio diha sa barangay Kalunasan duol sa quarry area ni Kapitan Nunilon Monares.
Kini tungod kay niadtong miaging semana duna nay nangreklamo sa paglihok sa yuta ug pagbaha.
Hinaut way mga kinabuhi nga maapiki ug hinaut hatagan og prioridad sa kapitan ang mga apektado nga mga molupyo.
Nahibulong lang ko nganong natugotan nga mohimo siya og quarry sa kaugalingon niyang barangay. Dili ba tataw ang conflict of interest niini?
Ambot nganong ang mayoriya sa mga sakop sa konseho mipiyong lang sa ilang mga mata niini.
* * *