Gula 20
Ug midugang sa pag-ingon ang amahan, "unsa may nasulod sa imong utok nga nangulata ka man og driver ha Carlo? Sa imong gibuhat sa prisohan ka magtingkagol!" Matud pa sa amahan nga dili tiaw ang kalagot sa gibuhat sa anak. Miduko na lang si Carlo. Nasayod siya nga dakong sayop ang gibuhat niya. Busa way rason nga mangatarungan pa siya.
"Kaayo gyud tawon nimung bataa ka. Inay tua ka sa eskwelahan sa kalsada ka ra diay nagbadhas nagtuo ko nga tua ka sa eskwelahan. Matud pa ining imong barkada wala ka mosulod sa inyong klase." Dugang pulong sa amahan samtang ang anak wa gyu’y tingog-tingog. Ug miingon pa ang amahan, "diha ka lang pag-ampo nga ma-settle ko kini sa driver nga imong gikulata." Ug milakaw palayo sa iyang nahimutangan si Arturo.
"Sultihi ra gud ko part kun unsa gyu’y nahitabo,” matud pa ni Pikot. "Dili na kinahanglan nga mahibawo ka pa," sa kataposan mitingog na gyud si Carlo.
"Nabalaka na baya ming imong mga barkada part pwerte gud nakung kurata pagkahibawo nako nga gidala ka sa pulis kay nangulata ka'g driver hasta si Vincent, basin og moanhi to. Kaming tanan nabalaka gyud," matud pa ni Pikot.
"Salamat sa inyong concern pero wala ko magkinahanglan ana. Sige na lakaw na pauli na ingna lang sila nga okay ra ko." Matud pa ni Carlo nga nagtuk-on sa daplin ug nagsige’g duko samtang nagsulti. Nanghupaw na lang si Pikot pipila ka minuto nga nagsige’g tutok ang higala kang Carlo, mitalikod na lang ni mipalayo sa prisohan nga nahimutangan ni Carlo. Dihang nabati ni Carlo ang tunob nga nagpalayo miyanghag kini aron tan-awon ang nakatalikod na nga si Pikot dayon nanghupaw og lawom kaayo ug miduko na sab.
Milanat og pipila ka oras ang pag-estar ni Carlo sa maong prisohan sa presinto sa kapulisan. Miabot ang amahan niini nga naka-uniform lang gihapon sa security guard. Nag-una niini ang usa ka pulis nga may dalang yawe. Yawe kini sa iyang nahimutangan giablihan ug gipagawas si Carlo. Nasayran nga na-settle diay sa iyang amahan ang kaso. Gibayran ang maong driver og dakong kantidad aron lang dili mopasaka og kaso. Gawas sa gasto sa pagpatambal tungod sa naangkon niining bun-og ug samad gibayran usab sa amahan ang boundary sa taxi. Ug gawas pa gyud niana gihatagan og dako-dakong kantidad agi'g bayad sa danyos.
"Mag-estoryahanay ta inig abot sa balay," matud pa sa amahan nga daling mitalikod kang Carlo. Misunod sa iyang amahan ang ulitawo. Mipara og taxi ang amahan misakay sa front seat samtang si Carlo usab sa back seat milingkod. Sulod sa taxi way tingog-tingog ang amahan ug anak hangtud nga naabot sila sa ilang balay. "Lingkod." Pagmando sa amahan milingkod si Carlo sa sala set ug milingkod usab atbang sa iyang gilingkuran ang amahan. Pipila ka segundo nga kahilom.
"Nahibawo ka ba kun unsa ka dako sa porhesyo ang imong gibuhat Carlo?" Matud pa sa amahan nga kalmado apan adunay nagpahipi nga kalagot. Igo lang sa pagpanghupaw si Carlo nga nagduko ug pagpanghupaw lang ang gitubag kay nasayod siya nga nakasala siya.
"Nahibawo ka ba sab nga pila ang kantidad nga akong gibayad sa driver nga imong gikulata? Dyes mil. Dako nga kantidad Carlo. Usa ka buwan ug tunga na nakong sweldo. Apan magpasalamat ka kay adunay nagpahulam nako ang imong inahan dali nakong gitawgan. Gipahibawo sa imong gibuhat gihatagan mo’g kaguol ang imong inahan didto sa gawas sa nasud. Pasalamat ka kay adunay tawo nga way duha-duha nga nagpautang nako.
Ug ang kantidad nga akong giutang bayranan pa to sa imong inahan. Mihilak si mama mo pagkasayod sa nahitabo. Wa ko magtukmod nimo nga maingon ka ana. Wala ka namo padak-a aron lang mangulata sa tawong way sala. Ang akong giingon kanimo kaniadto ug maoy gisilsil ko sa imong alimpatakan nga dili ka magpa-agrabyado... nga kun dunay manghilabot nimo mosukol ka. Nga dili ka magpatara wala tika sugoa nga mangulata ka’g tawo nga wa makasala nimo." Matud pa sa amahan nga inanay nang miisa ang tingog. "Sorry pa." Bugtong tubag ni Carlo sa taas nga litaniya sa amahan. Mibarog ang amahan nagpangumo nagkagot ang mga ngipon nga miduol'g dyutay sa iyang gilingkuran. (Sumpayan)