CEBU, Philippines — Gitan-aw karon sa Kagamhanan sa Dakbayan sa Sugbo ang posibilidad sa pagbutang og underground power distribution lines sa pipila ka lugar isip kabahin sa dugay na nga plano sa pagpalambo sa imprastraktura sa kuryente, ug pag-andam sa siyudad batok sa mga kalamidad.
Gihisgutan ni Mayor Nestor Archival ug mga opisyal sa Visayan Electric Company (VECO) ang maong inisyatiba lakip na kung unsaon nga mapaspasan ang pagtangtang sa nagkatag nga overhead utility cables o mas nailhan nga “spaghetti wires.”
Ang mayor nagkanayon nga wala pa’y gitakdang mga lugar o target nga petsa sa paglimpyo sa mga wire sa siyudad.
Matod pa ni Archival nga ang pagbutang sa mga linya sa kuryente ilalom sa yuta makatabang sa pagpanalipod sa mga kritikal nga imprastraktura batok sa mga bagyo, linog ug uban pang katalagman samtang makapamenos sab kini sa posibilidad sa mga power interruption.
Dugang pa sa mayor nga kinahanglan nga tangtangon ang nagbitay nga mga kable aron nga momenos ang mga posibleng disgrasya sa kadalanan subay sa paningkamot sa konseho aron nga masulbad ang dugay nang problema kabahin sa spagehetti wires.
Una nang giduso ni Konsehal Alvin Arcilla ang Single-Pole Ordinance nga nagtumong sa pag-regulate sa pag-instalar, pagmintinar ug pagdumala sa mga utility pole nga gigamit sa mga kompanya sa kuryente, telekomunikasyon, internet ug uban pang cable services.
Tumong niini nga mawagtang ang mga “spaghetti wires” ilabi na ang mga wala na gamita nga mga kable, ug mahiusa ang daghang utility poles ngadto sa usa ka dominanteng poste aron nga mokunhod ang visual clutter sa kadalanan. Ubos sa ordinansahon, usa lamang ka utility pole ang tugotan sa usa ka lokasyon, uban sa minimum nga gilay-on tali sa matag poste gawas kon adunay exemption. Usahon ang nagtapok nga mga poste samtang obligado ang mga utility companies sa pagtangtang sa delikado ug wala na gamita nga mga kable ug sa pagsunod sa engineering ug safety standards sulod sa tulo ka tuig nga implementasyon.
Kon mapatuman dungan ang underground power distribution project ug ang Single-Pole Ordinance, gilauman nga mas mapalig-on ang utility network sa dakbayan ug mahan-ay ang kinatibuk-ang dagway sa kadalanan sa siyudad. MEL BANAT NEWS