CEBU, Philippines — Mokabat sa 200 ka mga kawani sa Talisay City Hall ang gipakalitan sa pagkuha og drug test niadtong miaging adlaw.
Ang maong mga kawani naglangkub sa tulo ka departamento sa city hall, apil niini ang Civil Security Unit (CSU), City Assessor’s Office ug Solid Waste Management.
Suma pa ni Emely Cabrera, pangu sa Human Resource Department nga matag tuig gyud sila nga mohimo og drug test aron masiguro nga limpyo sa ilegal nga drugas ang mga kawani.
Ang mga pangu sa departamento mao ang nipili sa ilang mga sakop ma regular man o job order aron i drug test.
Nagkanayon si Cabrera nga ang magpositibo sa drugas ipaubos sa rehabilitasyon pero kung malimpyo na sila sa drugas mahimo ra sila makabalik sa ilang trabaho sa pasalig nga dili na sila mousab sa pag gamit og drugas. Nasayran ang Talisay adunay 300 kapin kun kulang ka mga regular nga kawani samtang kapin 2 mil ang mga job order nga kawani. MEL BANAT NEWS