CEBU, Philippines — Gironda sa kapolisan ang usa ka giingong ilegal nga buhatanan og paltik nga mga armas sa suok ug kalibonan nga bahin sa Sitio Cantawan, Barangay Cahumayan sa Siyudad sa Danao niadtong
Ang operasyon niresulta sa pagkasikop nilang Nelson Macabos Monticalbo,39, ug Teodoro Quimbo Lugas, 56, pulos residente sa Brgy. Cahumayan, Danao City.
Nasikop ang duha ka ilegal nga tighimo og armas de fuego atol sa buybust operation nga gipahigayon sa Criminal Investigation and Detection Group Provincial Field Unit didto sa Sitio Cantawan, Brgy. Cahumayan, Siyudad sa Danao pasado alas- 10:40 kagahapon sa buntag.
Matud pa sa otoridad nga nakadawat sila og impormasyon kabahin sa ilegal nga nanghimo og mga pusil sa maong dapit hinungdan ila kining gipanid-an.
Sa dihang nagpositibo ang maong impormasyon gipahigayon dayon ang buybust operation hinungdan sa pagkasikop sa duha ka mga dinakpan.
Nakompiska gikan sa mga suspek ang tulo ka mga kalibre .45 nga pistola, mga magazine ug mga bala lakip sa gikompiska ang mga ekipo sa paghimo sa armas sama sa duha ka push drill, duha ka electric grinders, duha ka gabas, tulo ka martilyo,walo ka handgrip sa kalibre 45.
Dugang pa sa otoridad nga ang mga dinakpan makahimo kini og tulo ka armas matag semana. Ang mga dinakpan mag atubang og kasong kalapasan sa Sec. 32 sa RA 10591. -- IBM BANAT NEWS