CEBU, Philippines — Gikonsidera karon sa pipila ka stakeholders ang pagtapos sa power service sa Power Source Philippines Inc. (PSPI) sa Isla sa Malapascua sa Lungsod sa Daanbantayan tungod sa kapakyas niini sa pagsulbad sa problema sa kuryente sa maong isla.
Atol sa tigom sa Kapitolyo niadtong Hunyo 19, 2024 ang lokal nga kagamhanan sa Daanbantayan ug ang mga miyembro sa Malapascua Business Association niduso og petition ngadto kang Gobernador Gwendolyn Garcia aron adunay dinaling aksyon sa maong problema bisan og nagpasabot kini nga ihunong na ang serbisyo sa PSPI.
Si Anna Reed, presidente sa Malapascua Business Association nisaysay sa pipila ka pakyas nga nahimo sa PSPI sukad niadtong tuig 2019 ug sa epekto sa kinabuhi ug panginabuhi sa mga taga isla tungod sa krisis sa kuryente.
Apil sa maong tigom mao ang Department of Energy Visayas Field Office Inspector, Atty. Barrytone Busi; National Electrification Administration Engineering Department Director Federico Villar; Daanbantayan Municipal Administrator Mamerto Rodrigo; ug PSPI executive Carlos Cervantes.
“It has continued all through these years, and that is where my responsibility lies because I have to do something in order to alleviate the situation. And if a continuing partnership is what you are offering, I’m sorry, I cannot even consider you a partner of the Pprovince because that’s not the way we operate”, matud ni Garcia ngadto kang Cervantes base sa taho sa Sugbo News.
Bisan ang CEBECO II, gipangulohan sa general manager niini nga si Lowell Belcina, ug National Power Corporation, girepresentahan sa hepe niini sa Visayas nga si Timoteo Diacor nipadayag og kasagmuyo sa PSPI.
Nibutyag ang maong mga opisyal kang Garcia nga ang maong concern nila sa PSPI napadangat na ngadto sa ilang management ug naghulat na lang og pinal nga desisyon.
Ang PSPI naghatag kini og electricity service sa Malapascua isip qualified third party sukad sa tuig2009.
Ang CEBECO II maoy exclusive franchise holder sa isla ug ubang lungsod sa norte.
Giingong sukad niadtong Semana Santa kanunany nga nakasinati og brownout ang isla nga nakaapekto na sa operasyon sa mga patigayon ug residente niini hinungdan nga ang LGU sa Daanbantayan nidangop ngadto sa gobernador.
Isip solusyon, ang Kapitolyo nag-abang og upat ka generator nga adunay 2 megawatts aron matubag ang peak demand sa kuryente sa isla. (BANAT NEWS)