CEBU, Philippines — Gidakop ang usa ka ginang kay giingong nanghulga gamit ang pinote human napungot sa mga tawo nga magsige og padungog-dungog kaniya diha sa P. Del Rosario Extension, Barangay Sambag 1, siyudad sa Sugbo, niadtong Miyerkules, Hunyo 19, 2024.
Ang dinakpan mao si alyas Hyde, 42 anyos, residente sa naasoy nga lugar samtang ang nagpadakop kaniya mao ang 37 ug 32 anyos nga mga babaye nga nagpuyo sa dapit.
Sa imbestigasyon sa Police Station 2 sa Cebu City Police Office(CCPO) gibutyag sa mga biktima nga samtang naglakaw sila paingon sa ilang balay nakabantay ang suspek ug misulod sa ilang balay.
Apan dihang naabot na sila sa pultahan sa balay sa suspek nakit-an nila kini nga nagdala og pinote ug mibahad nila nga pamatyon.
Giingong gisuwayan sila og atake sa suspek apan napugngan sa mga silingan.
Apan ang suspek sa iyang bahin miingon nga gipakita ra niya ang pinote isip panghadlok kay napungot siya nga pirme padungog-dungogon og estorya. (BANAT NEWS)