CEBU, Philippines — Sa prisohan gasaulog og Father’s Day ang usa ka amahan human siya giunay pagpapriso sa iyang anak ug sa kapikas niini tungod sa pagmaoy niini dihang nahubog niadtong Biyernes sa gabii diha sa Sitio Laguna, Barangay Bulacao sa Dakbayan sa Sugbu.
Tulo ka adlaw nga natanggong sa kustodiya sa Inayawan Police Station 7 ang 64-anyos nga amahan tungod sa matud pa gisulong niini ang balay sa iyahang umagad nga gadala og kutsilyo.
Giingong hubog kini og gihagit og away ang iyang umagad. Mihangyo ang umagad sa suspek nga mouli nalang apan giingong nagmagahi kini ug pugsanong nisud sa balay ug giwara-wara ang kutsilyo ngadto sa iyang anak ug apo.
Maayo nalang nga nangabot ang mga tanod sa barangay ug gidala ang suspek sa police station hasta ang kutsilyo nga gigamit niini sa pagpanghulga.
Atol sa inisyal nga imbestigasyon, nasayran nga iro ang hinungdan sa kalagot sa suspek ngadto sa iyang umagad kay matud pa gipatiran kini sa naulahi.
Wala na hinuon gipadayon sa iyang mga anak ang pagpasaka og kaso sanglit ang pagpapriso kaniya sud sa tulo ka adlaw para lang motagam kini.— Irish Laborte, John Mark Dejito (BANAT NEWS)