CEBU, Philippines — Gibanabanang kapin 60 ka mga panimalay ang naugdaw sa sunog nga niulbo sa tulo ka mga purok sa Barangay Basak sa Dakbayan sa Mandaue alas-11 pasado sa buntag kagahapon, adlaw nga Huwebes.
Ang mga balay nga naapektahan nahimutang sa Purok Alliance, Purok Santan, Purok Saging-Saging sa maong barangay nga diin sagad ginama sa mga gaay nga materyales.
Ang sunog naglambigit og residential houses nga giingong nagsugod gikan sa balay nga gipanag-iya ni Merced Pano Kyamko.
Hingpit nga napawong ang sunog alas 12:43 na sa udto, wala hinooy gikataho nga nakalas o naangol sa maong pag-ulbo sa sunog.
Dili mominos sa P280 mil ang danyos nga gibilin sa maong sunog.
Matud pa ni SFO1 Shanmie Brian Pocado, Mandaue City Fire Investigator naglisod gyud sila sa pagsulod sa lugar tungod sa kahagip-ot sa dalan padung sa fire scene.
Gawas pa nga walay klarong agianan, ang lugar nga nasunogan naa sa kanipaan ug katunggan, ang mga bombero kinahanglang mosubay og mga gagmay nga taytayan para sa tawo nga ginama sa kahoy.
Pipila ka mga residente ang nakita sa Banat News nga nagdala og ilang mga balde aron mokawos sa hugaw nga tubig gikan sa sapa-sapa nga ang tubig gikan sa nagkalain-laing kanal sa siyudad aron dunay mabubo nga tubig sa nasunog nilang kabalayan.
“Naglisod gyud ta sa access sa kagamay sa dalan pag-abot sa sulod nadugang ang problema kay kulang nasad ug tubig kay dili man kasulod ang dagkong firetrucks, (mga) penetrators ra man niya dali kaayo mahutdan og tubig,” ni Pocado pa.
Ang kabomberohan padayon pa sa pagpahigayon sa ilang imbestigasyon may kalabutan sa hinungdan sa pag-ulbo sa maong sunog. Gibanabana nga 70 ka pamilya o 375 ka individual ang apektado sa pag-ulbo sa maong sunog. — IBM BANAT NEWS