CEBU, Philippines — Gitanggong karon sulod sa holding facility sa Liloan Police Station ang usa ka tawo nga matud pa kalit lang midunggab sa duha ka mga lalaking nanan-aw og duwa nga volleyball diha sa Sitio Tabay Lawom, Barangay San Vicente, Lungsod sa Liloan sa miaging gabii.
Ang suspetsado giila nga mao si Darwin Talisik Atis, 35, nagpuyo sa Upper San Vicente sa maong lungsod.
Si Police Major Eric Gingoyon, hepe sa Liloan Police Station miingon nga hubog ang suspetsado nga nagdala og 9-pulgadas nga kutsilyo.
Giduol sa suspetsado ang unang biktima nga si nga si Regie Arnaiz ug gidunggab kini apan nakabantay ug nakasagang, ang suspek mibalhin sa iyang atensyon sa ikaduhang biktima nga si Saul Mantuhac ug gidunggab sab niya kini apan nakabantay sab ug nakadagan.
Dihadiha nangabot ang mga barangay tanod ug gidakop ang suspetsado ug gitahan kini sa kapolisan
Si Gingoyon miingon nga ang maong suspetsado aduna kini kaagi sa pagpanunggab dihang nakainom usab kini og ilimnong makahubog
Ang kasong double frustrated murder ang giandam nga kaso sa kapolisan batok sa maong suspetsado. — IBM BANAT NEWS