CEBU, Philippines — Malaumon si Talisay City mayor Gerald Anthony “Samsam” Gullas nga mahurot na sa pagpasiga ang suga sa Cebu South Coastal Road (CSCR) sa di pa matapos ang buwan sa Septiyembre.
Kahinumduman ang mga suga sa CSCR nangaguba gumikan sa bagyong Odette niadtong Disyembre 2021.
Ang proyekto sa pagpasuga iya sa Department of Public Works and Highways (DPWH) pinaagi ni kongresista Rhea Gullas.
Gipasabot sa mayor nga nalangay kini tungod kay ang pundo wala dayon masulod sa tuig 2022 nga budget.
Hinungdan nga sa tuig 2022 gipaspasan sa kongresista nga isulod ang budget niini karong tuiga.
Ang pagtrabaho sa pagpasiga sa suga nagsugod diha sa Barangay San Roque ug karon napasiga na nila hangtud sa Barangay San Isidro. Matud pa ni Gullas nga iya nang gihangyo ang DPWH nga tapuson ang trabaho sa Septiyembre 29 aron inig Oktubre 1 atol sa pagsugod sa kalihukan sa kapistahan hayag na gyud ang kadalanan. (BANAT NEWS)