CEBU, Philippines — Gitinguha karon sa kapolisan sa Lapu-Lapu City Police Office (LLCPO) ang pagpagawas og cartographic sketches niadtong lalaki nga gikatahapang nalambigit sa human trafficking kinsa nisulay sa pagbiktima sa upat ka menor de edad nga mga babaye niadtong Hulyo 23, 2023.
Si Police Lieutenant Colonel Christian Torres, hepe sa City Investigation and Detective Management Unit (CIDMU) sa LLCPO nagkanayon nga sa nakuha nga hulagway nga plate number sa motorsiklo sa maong lalaki ilang nahibaw-an nga narehistro kini sa Malaybalay Bukidnon sa Mindanao area. Matud ni Torres nga subay sa gibutyag sa mga biktima ngadto kanila ilang nasayran nga gi-hire sa maong lalaki ang nahisgutang mga menor de edad aron kunohay himuong model sa milk tea.
Ang maong mga menor gidala sa nahisgutang lalaki sa giabangan niining boarding house diha sa Barangay Pajac apan gibati nila ang kahadlok dihang ilang nakita ang kadena, pala, bara ug alambre nga maoy hinungdan sa ilang pagpanagan ug nisumbong sa ilang mga ginkanan.
Si Torres nagkanayon nga dihang ilang gisusi ang boarding house wala sa maong dapit ang nahisgutang lalaki ug nibiya kini nga wala na mananghid sa tag-iya sa boarding house. (BANAT NEWS)