CEBU, Philippines — Mokabat sa 6 ka panimay ang nasunog didto sa sitio Macupa, Laray, Barangay San Roque, Dakbayan sa Talisay niadtong Biyernes sa hapon.
Si Fire Chief Insp. Alvin Torion, fire marshal sa siyudad nibutyag nga nakadawat sila og tawag gikan ni Jessa Peñaflor labot sa sunog mga 1:23 sa hapon hinungdan nga ilang girespondihan ug hingpit nila nga napawong ang kayo ala una singkwenta.
Matud pa ni Torion nga upat ka panimay ang hingpit nga naugdaw samtang duha ang partially damaged.
Sa inisyal nga pakisusi sa kabomberohan giingong nagsugod ang kayo sa panimay ni Daniel Sordilla hangtud nga kini midako og mitapon sa tapad nga panimay.
Usa ka Anton Castillanes ang nasamdan sa iyang ulo atol sa sunog human naigo sa nagtagak-tagak nga jealousy.
Gibana-bana nga moabot sa P270 mil ka pesos ang danyos sa maong sunog.
Ang mga silingan nihulagway nga nabiyaan nga katol ang hinungdan sa sunog human ang tag-iya mibiya sa trabaho.
Apan si Torion nitataw nga ila pa nga gihimo ang imbistigasyon aron masuta gyud ang tinuod nga hinungdan sa sunog.