CEBU, Philippines — Ipaubos na sa Blue Alert Level karong hapon adlaw nga Miyerkules ang Dakbayan sa Sugbo agi’g pagpangandam sa epekto sa nagdanga-danga nga bagyo nga gituohan nga gipaabot nga mahimong usa ka super typhoon.
Ang Cebu City dili mokompyansa bisan og dili mo land fall ang bagyo apan gipanglantawan nila nga usa ka supertyphoon.
Ang Cebu City Disaster Risk Reduction and Management Office, niposisyon na sa ilang mga gikinahanglan sa higayon nga adunay mga moigo nga katalagman sama sa nanglabay nga bagyo.
Kung mahinumduman usa ang dakbayan sa nagrabehan sa Bagyong Odette niadtong Disyembre 16, 2021 ug dili na nila buot mahitabo nga daghang nadanyos sa pagigo niini.
Sumala pa ni Harold Alcontin ang pangulo sa CCDRRMO, bisan ug wala pa mosulod sa PAR ang bagyo gimandoan na sila ni Mayor Michael Rama nga pangandaman kini.
Tutukan nila ang tanan ilabi na kadtong mga lugar nga peligro sa baha ug sa pagdahili sa yuta
Ang tanang sakop sa CDRRMO nga naka leave kanselado na kini ug naka standby na sila sa pagsulod hangtud na usab sa pagbiya sa bagyo.
Makig-alayon usab ang CDRRMO sa PAGASA aron masayran nila ang lakaw sa bagyo nga adunay international name Mawar ug tawagon kini sa pangalan unya nga Betty kun mosud na sa PAR.— IBM (BANATNEWS)