CEBU, Philippines — Patay ang usa ka tinun-an sa mechanical engineering sa usa ka unibersidad sa Siyudad sa Mandaue human nga ang motorsiklo niining gisakyan kauban iyang classmate nabanggaan og freezer van diha sa dalan S. Jayme sa Barangay Paknaan kagahapon, Biyernes sa kaadlawon.
Si Police Corporal Darwin Cempron, field investigator sa Traffic Enforcement Unit sa Mandaue City Police Office (MCPO) miila sa namatay nga mao si James Carlo Tongco, 21, taga Barangay Tingo sa Isla sa Olango sa Siyudad sa Lapu-Lapu apan nagpuyo sa Barangay Pusok sa maong siyudad.
Samtang naangol nga angkas niini nga si Carl Balonos, 20, taga Zone Gabi sa Barangay Paknaan sa siyudad sa Mandaue.
Si Cempron miingon nga gikan nag-inom sa Lungsod sa Consolacion kauban sa ilang mga classmates ang mga biktima.
Apan sa ilang pagpauli nabangga sila sa maong van nga nagkarga og karneng baboy padung sa merkado sa Lungsod sa Compostela nga gimanerho ni Rance Asilo, 21.
Tungod sa kakusog sa panagbangga nalamba ang motorsiklo sa duha. Gidala sila sa Mandaue City Hospital apan si Tongco nga maoy nagrabehan ang gideklarar sa mga doktor nga dead on arrival.
Si Asilo gikostudiya karon sa kapolisan alang pagpasaka unya og kaso. — /IBM (BANAT NEWS)