CEBU, Philippines — Gipasidan-an sa kapolisan sa Lapu-Lapu City Police Office (LLCPO) ang mga Oponganon nga sa ilang pagtambong og mga Christmas party niining panahon sa pagsaulog sa pasko likayan ang pagpalabi og inom sa ilimnong makahubog nga mosangko na sa pagmaoy ug likayan usab ang paggamit sa ilegal nga drugas.
Si Police Colonel Elmer Lim, direktor sa LLCPO atol sa press briefing nga gipahigayon uban sa mga tigbalita nagkanayon nga ang pagpatuyang sa pag-inom og ilimong makahubog o paggamit sa ilegal nga drugas posible na hinuon nga mosangko sa pagkabalhog sa bilanggoan.
Matud ni Lim nga kon mo inom man gani sigurohon lang nga makapauli pa og tarong sa tagsa-tagsa ka mga panimalay nga walay nabuhat nga mga kadaot aron dili kini mabalhog sa prisohan.
Si Lim mipahimangno usab sa motambong og mga party niining panahon sa pasko nga mga Oponganon nga likayan ang paggamit og ilegal nga drugas sama sa shabu, ecstacy ug uban pa nga mga party drugs tungod kay dako ang kahigayonan nga makamugna og kasamok sa kumonidad.
Nunot niini, si Lim niawhag usab sa mga party organizers sama sa pagpahigayon og disko o konsiyerto isip kabahin sa mga kalingawan niining panahon sa pagsaulog sa pasko nga mo-coordinate kini sa buhatan sa kapolisan ug ingon man mokuha gyud og permit sa lokal nga kagamhanan sa paghatag og kasiguroan sa mga manambong niini. —/BDB (BANAT NEWS)