CEBU, Philippines — Temporaryong sirad-an ang pipila ka bahin sa southbound ug northbound lanes sa Cebu South Coastal Road (CSCR). Base sa advisory nga giluwatan sa Cebu Cordova Link Expressway Corp. (CCLEC), sugod karong adlawa Marso 31 hangtud na sa Abril 7,2022 ang pagsira niini gumikan sa nagpadayon nga pag-trabaho sa taytayan nga nagsumpay sa Siyudad sa Sugbo ug sa Lungsod sa Cordova.
Ang North bound masirad-an og usa ka lane (outer lane) gikan sa NUSTAR padulong sa SM Seaside (500m). Ang sa South bound masirad-an pud og usa ka lane (inner lane). Sirad-an usab og usa ka lane ang north bound karong Marso 31 hangtud Abril 20, 2022 ug ang CSCR Viaduct masirad-an usab og usa ka lane paingon sa norte nga bahin.
Tungod sa daghang sakyanan, mag-abli og zipper lane gikan sa alas 6 hangtud alas 10 sa buntag. Ang light vehicles maoy gitugtan nga makagamit sa zipper lane.
Ang tibuok viaduct sirad-an sugod alas 10 sa gabii hangtod alas 4 sa buntag. Ang padulong Norte mahimong moagi sa F. Vestil road gamit sa U-turn slot. Ang padulong South mahimong mogamit sa N. Bacalso Ave. Sa nasayran ang CCLEX mogamit sa usa ka all-electronic toll collection system aron makahatag og luwas ug hapsay nga pagbiyahe ug gikatakda kini nga buksan sa mga motorista karong tuiga. —MEL (BANATNEWS)