CEBU, Philippines — Gibutyag ni Konsehal Raymond Garcia, ang chairperson sa committee on budget and finance sa Konseho sa Siyudad sa Sugbo,nga nagsugod na sila og tigom sa mga miyembro sa local finance committee alang sa gitingoha nga Supplemental Budget No. 1 (SB 1) karong tuiga.
Usa sa dako nga item niini mao ang hinabang alang sa mga naapektohan sa bagyong Odette ingon man usab ang mga programa alang sa Covid-19 response sa siyudad.
Suma pa ni Garcia nga gimandoan ni Mayor Michael Rama ang local finance committee nga mangita og kakuhaan sa pundo alang sa SB 1.
“Nakigmeet si Mayor Rama namo pag last week asking for sources of funds ug angay nga gastuonon. Usa sa dako nga item mao gyud ang itabang nato sa typhoon victims,” matud pa ni Garcia.
Kahinumdoman nga nitagana ang siyudad kaniadto og P500 million alang sa ayuda sa mga naapektohan sa bagyo, ug dugang P500 million alang sa ubang kinahanglanon sa pagbangon sa siyudad human gikuso-kuso sa bagyo. Nasayran angayan pa dugangan ang budget alang sa maong butang sanglit nagpadayon pa ang recovery program sa siyudad.
Hugtanon usab nga gihimakak ni Garcia ang intriga sa mga kritiko nga matud pa wala na'y budget o napurdoy na ang kagamhanan.
Matud pa niya, nga duna pa'y P18 billion ang siyudad nga naka-deposito karon sa Bangko. —MEL (BANATNEWS)