CEBU, Philippines — Nagtagbo sa unang higayon kagahapon ang Special Investigation Task Group Rey Cortes.
Kini ang gibutyag ni Police Lieutenant Colonel Wilbert Parilla, deputy city director for operation sa mga sakop sa media.
Matud pa ni Parilla nga gawas sa tigom sa SITG aduna usab silay meeting sa Zoom sa Office of the Presidential Task Force on Media Security.
Ang tanang sakop sa SITG gihatagan og higayon karong Huwebes sa pagsumiter sa ilang mga taho kalabotan sa kamatayon ni Cortes.
Gibutyag ni Parilla nga ang Criminal Investigation and Detection Group maoy gitahasan sa pagkolekta sa tanang footage sa Close Circuit Television (CCTV) diha sa lugar nga nahitaboan.
Ang kapolisan aduna na kini person of interest nga gitutokan apan wala pa sila mobutyag sa gidaghanon niini.
Matud usab ni Parilla nga gitutokan usab nila karon ang kalabotan sa trabaho, personal nga kinabuhi ug dugang mga impormasyon nga gihatag sa buhatan sa Presidential Task Force on Media Security.
Giawahg usab sa kapolisan ngadto sa pamilya nga kong mahimo ma-turnover ang cellphone sa biktima tungod kay makatabang kini og dako sa ipahigayon nila nga imbestigasyon. BDB (BANATNEWS)