CEBU, Philippines — Ang Cebu City Health Department nakatala og pagkunhod sa kaso sa dengue sa siyudad ning tuiga sa 2021 kun itandi sa tuig 2020.
Matud ni Cebu City Health Officer-in-charge Dr. Jeffrey Ibones, base sa kataposang natala niadtong Mayo 2 ning tuiga, naa lang sa 35 ka dengue cases ang natala itandi sa miaging tuig gikan sa Enero hangtod sa Mayo naa sa 554 ka kaso sa dengue ang na-report.
Karong tuiga, ang siyudad sa buwan sa Enero dunay 16 ka kaso, sa Pebrero 2, Marso 10, Abril 5 ug sa Mayo 2.
Hinoon mipasidaan si Ibones nga posibleng mosaka ang mga kaso sa buwan sa Mayo sanglit wala paman nahuman ang buwan ug nagpadung na sab ang tinguwan.
Sa miaging tuig, ang Cebu City sa buwan sa Enero dunay 300 cases sa dengue, 211 sa Pebrero, 24 sa Marso, 10 sa Abril ug 9 sa Mayo.
Sigon ni Ibones sa 1,081 total dengue cases niadtong 2020, ang siyudad nakatala og taas nga kaso sa buwan sa Enero ug Pebrero.
Mahitungod sa dengue-related deaths, ang CHD nakatala og 14 sa miaging tuig samtang duha lang karong tuiga.
Sa tuig 2020 ang barangay nga daghan og kaso mao ang Guadalupe nga dunay 76 ka kaso, Talamban 60, Tisa 58, Labangon 57, Lahug 44, Basak san Nicolas 43, Punta Princesa 32, Apas 28, Capitol Site 20 ug Adlaon 15.
Samtang itandi sa 2019 nga data ang siyudad dunay 50 percent decrease sa dengue cases sa tuig 2020 tungod kay ang total cases sa dengye sa 2019 naa sa 2,930.
“So far, dako gyud kaayo’g deperensya from 2019, 2020, 2021 ang cases sa dengue,” pamahayag pa sa doktor.
Nagtuod si Ibones nga kining COVID-19 pandemic dunay kalambigitan sa pagkubos sa mga kaso sa dengue sa siyudad karong tuiga.
Gipahinumduman niini ang katawhan sa siyudad nga ipabalinan ang kalimpyo sa palibot ilabi na sa mga lugar kun asa ang lamok mahimong mopuyo ug mas may panahon karon ang mga tawo sa pagpanglimpyo tungod sa mga restriksyon.
“Ang importante gyud kaayo, ang pagpanglimpyo gyud sa palibot. Importante gyud kaayo ta’ng manglimpyo kay mabantayan man nato ‘tong mga butang nato nga naay posibilidad nga adto didto ang dengue nato magpuyo, labi na kanang mga tubigan sama sa balde nga naay tubig, tabunan gyud nato, ligid nga naay sud tubig atoa gyud nang iyabo,” ni Ibones. —/IBM (BANAT NEWS)