CEBU, Philippines — Ang Cebu Provincial Anti-Drug Abuse Office (CPADAO) mopahigayon na usab og drug test sa mga magtutudlo sa pampublikong tunghaan ubos sa Cebu Province division sa sunod semana.
Matud ni Carmen Remedios Durano–Meca, pangulo sa CPADAO nga tanang teaching ug non- teaching staff sa mga publikong eskwelahan ang ipaubos sa kinalit nga drug test.
Ang pagpaubos og drug test sa mga magtutudlo usa kini sa mga pamaagi sa Department of Education ug sa Probinsiya sa Sugbo pagsiguro nga walay magtutudlo nga nalambigit sa ilegal nga drugas ug mamahimong makaimpluwensiya sa mga tinun-an niini.
Matud usab ni Meca nga gawas sa mga magtutudlo apil nga tutokan nila karon mao ang drug test transportation sector diin naglakip na kini sa mga drayber sa mga bus ug uban pang PUV.
Si Meca nagkanayon nga ang drug test sa transportation sector gipangulohan kini sa Philippine Drug Enforcement Agency (PDEA) ug igo ra mohatag ang CPADAO sa drug test kit.
Ang CPADAO nakig-alayon usab sa Bureau of Jail Management and Penology alang sa pagpahigayon og drug test sa mga personnel sa prisohan.
Sa tibuok bulan sa Mayo adunay 331 ka BJMP personnel ang na-drug test sa CPADAO diin 34 niini ang personnel sa BJMP Cebu City, 37 sa Dakbayan sa Toledo, 53 sa Dakbayan sa Talisay, 37 sa Dakbayan sa Danao, 128 sa Cebu City Jail male dormitory, 23 sa Consolacion ug 19 ka personnel sa BJMP Dakbayan sa Naga.
Apil usab nga gipaubos sa drug test sa CPADAO ang 53 ka warden ug walay nagpositibo sa resulta niini. BDB (BANATNEWS)