CEBU, Philippines — Giawhag ni Gobernador Hilario Davide III ang mga social workers sa probinsya sa Sugbo nga magmatinud-anon sa trabaho human nga adunay usa ka social worker nga nasakpang nangilad sa Paglaum Scholarship Program sa probinsya.
Gusto ni Davide nga pasakaan og kaso ang maong social worker nga si Heidie Aplece ang soical worker sa Muncipal Social Welfare and Development Office (MSWDO) sa Daanbantayan.
Giingong aduna kini gipang endorso nga mga aplikante nga dili kwalipikado sa programa kay arangan man sila og kabutang.
Ang Paglaum Scholarship program sa kapitolyo para lang gyud sa mga kabus nga tinun-an kansang mga ginikanan way kapasidad makapaeskuyla kanila sa kolehiyo.
Gusto ni Davide nga dili magsalig ang mga social workers sa isumiter nga pangalan gikan sa barangay kay kinahanglan man unta nga sila maoy mangunay pagsubay kon unsa ka tinuod ang mga impormasyon bahin sa giendorso nga tinun-an.
Si Bise Gobernador Agnes Magpale miingon nga unom ka mga tinun-an ang napasulod ni Aplece sa Paglaum bisan pa man og may kapasidad ang ilang pamilya nga makapaeskuyla kanila sa kolehiyo.
Matud niya kon dunay moatras nga scholars nga giendorsar ni Aplece mahimo nila kining ilisan sa mas kwalipikado sa programa.
Gawas sa free tuition, ang mga scholars sa Paglaum makadawat kini og P1,500 nga allowance matag bulan gikan sa probinsya sa Sugbo. (/IBM)(BANATNEWS)