CEBU, Philippines – Giangkon ni Bohol Provincial Board Member Niño Rey Boniel nga siya inosente sa pasangil nga iyahang gipatay ang iyang asawa nga si Bien Unido Mayor Gisela Boniel. Kini mao ang unang higayon nga niatubang ug nitubag si Boniel sa mga pangutana sa media.
Kauban sa iyang abogado nga si Gerardo Carillo, si Boniel wala nipili sa dili pagtubag atol sa pagbasa sa iyang kaso kagahapon sa Lapu-Lapu City Palace of Justice. Tungod niini ang korte na ang ni-enter og not guilty plea para kaniya.
Si Carillo mitug-an sa media nga wala nila gipasud og plea si Boniel tungod kay hangtud karon padayon ang ilang pagkwestyon sa legalidad sa pag-aresto sa iyang kliyente niadtong Hunyo 7, 2017 sa kasong pagpatay kang Gisela.
Giingong gipusil si Gisela sa ulo ug pagkahuman giputos og pukot nga gibutangan og bato dayon gitambog sa kadagatan taliwala sa Caubian ug Olango Island sa Lapu-Lapu City.
Gawas kang Boniel, silang Riolito Boniel, Randel Lupas, Wilfredo Hoylar, ug Restituto Magoncia, Jr. gibasahan usab sa ilang mga kaso kagahapon diha sa sala ni Regional Trial Court Judge Ferdinand Collantes.
Sila si Riolito ug Lupas ubos sa Witness Protection Program sa Department of Justice (WPP-DOJ) gilabanan ni Atty. Julius Pilapil sa Public Attorney’s Office.
Ang duha gipasul-ob og bullet proof vest ug mi- plead not guilty sa kasong pagpatay tungod sa pakigkunsabo nila sa board member.
Samtang si Hoylar ug Magoncia nga gilabanan ni Atty. Renato Galleon, sama kang Boniel, wala sila motubag sa akusasyon kay gikwestyon pa nila ang legalidad sa pag-aresto kanila. Tungod gihapon niini, ang korte na maoy mipahibalo nga sila mi- plead not guilty.
Gusto unta sa depensa nga hunongon ang pre-trial conference tungod kay duna pa silay pending motion sa DOJ apan si Judge Collantes mihukom nga ipadayon ang pre-trial conference for lack of legal basis.
Miinister ang prosekusyon nga bisan wala silay napresentar nga death certificate sa mayor apan duna silay 40 ka mga testigos nga makasuporta sa kaso.
Ang sunod nga hearing mahitabo karong Septiyembre 7 ning tuiga. (/IBM)(BANAT NEWS)