CEBU, Philippines — Usa ka langyaw nga turista ang gikatahong natagak sa Osmeña Peak sa lungsod sa Badian kagahapon sa udto samtang nagpakuha og hulagway isip souvenir sa iyang pagsuroy dinhi sa Sugbo.
Si Lau Tin Yan, 35 anyos, Chinese national nga taga Hong Kong giingong nagpatong kini sa usa ka dakong bato didto sa kinatumyan sa maong popular nga bukid apan nawad-an kini og balanse ug natagak hinungdan sa naangkong samad sa hawak ug sa ubang bahin sa lawas.
“Nipatong ni siya sa bato didto sa Osmeña Peak aron magpa-picture dayon na slide or na out of balance ni siya unya giingong nga basig kusog kusog pud ang hangin didto mao to nga na outbalance, so nahulog siya sa kilid mga about 10 to 15 meters siguro.
Wala hinoon siya mahulog all the way down murag nasangit ra siya sa kilid,” matud ni Junry Tenefrancia ang local disaster officer sa lungsod sa Dalaguete.
Miresponde dayon sa lugar ang mga polis sa Dalaguete ug nisunod ang LDDRM sa lungsod ug ilang gidala ang langyaw sa Julio Cardinal Rosales Memorial District Hospital ug gibalhin sa UC Medical Center sa dakbayan sa Mandaue. Ang Osmeña Peak ubos kini sa hurisdiksyon sa Badian apan ang entrada pasaka didto anha agion sa barangay Mantalongon sa lungsod sa Dalaguete.
Si Tenefrancia nipahimangno sa mga turista ug ingon man sa mga tourist guides nga mag-amping hilabina sa pagsaka didto.
Matud niya nga kon mamahimo dili na lang mopatong sa mga bato o sa mga dapit nga delikado paglikay sa disgrasya.(/IBM)(BANATNEWS)