CEBU, Philippines - Onse ka mga pampasaherong bus ang nahatagan og special permit kagahapon sa Land Transportation Franchising and Regulatory Board-7 aron makabiyahe bisan dili ilaha nga rota ning panahon sa kalag-kalag.
Gitug-an ni Emil Membrillas, Assistant Information sa LTFRB-7 nga nahinabi sa Banat News.
Matud pa ni Membrillas, siyam ang nikuha sa North Bus ug duha lang sa South Bus Terminal.
Apan sa kinatibuk-an, aduna silay gatos kapin na ka mga out of the line trip ang nikuha og permit aron makabiyahe sa dili ilang rota.
Sumala pa ni Membrillas, dili pa kaayo daghan pasahero kagahapon sa mga terminal apan ilang gipaabot nga modagsang karong adlawa ang mga pasaherong mamauli.
Atol sa ilang monitoring kagahapon usa ka sakyanan nga giingong kolorum ang ilang gisikop kay pribado kini nga awto apan gigamit nga pasaheroan.
Ang maong sakyanan gimaneho sa usa ka Ramonlito Panugan nga gihimong Uber taxi. Matud pa nakalapas kini sa balaod tungod kay walay prangkisa apan namasahero. Si Membrillas nitug-an nga kalapasan ang paghatod sa pasahero bugti sa bayad sa mga pribadong mga sakyanan. Sa pagkakaron, wala pay gitugot ang LTFRB nga maka-operate ang Uber taxi dinhi.
Ang maong awto gi -turnover na nila sa LTO ug base sa Joint Administrative Order dili mominos sa P120 mil ang multa sa maong kalapasan
Si LTFRB-7 Regional Director Ahmed Cuizon mibutyag nga ang kotse, usa ka Toyota Vios nga may plaka nga VD 5050 nasakpan nga nagpakanaog og pasahero didto sa North Bus Terminal mga ala 1:15 sa hapon.
Matud ni Cuizon nga ang kotse gipanag-iya sa usa ka Maricel Salcedo apan wala makapakita og papeles gikan sa LTFRB nga nagtugot ang maong kotse magamit sa pagpamasahero.
Si Cuizon miingon nga nasuta sa iyang mga sakop nga ang kotse gigamit isip Transport Network Vehicle Service, diin kadtong gusto nga mosakay, mogamit lang sa ilang cellphone aron pagkontak sa opisina sa maong TNVS.
Si Richard Cabucos nga maoy presidente sa Metro Cebu Taxi Operators Association (MCTOA), miingon nga mireklamo ang mga sakop niyang taxi operators tungod sa pagdagsang sa mga kulurom nga sakyanan nga gigamit sa pagpamasahero. Rowena Capistrano ug Rene Borromeo (BANAT NEWS)