CEBU, Philippines - Nasikop sa kapolisan ang di mominos 12 ka tawo human nasakpan nga ilegal nga nanagat sa lungsod sa Daanbantayan kagahapon.
Ang mga nasikop naglakip nila ni Alfredo Consas, 54, boat captain; Raul Alesna, 37; Jerry Boy Monato, 26; Archie Diola, 21; Manny Batinacila, 23; Arthur Reyes, 25; Junard Opteria, 20; Junrey Negapatan, 21; Division Illustrisimo, 44; Cedric Acucena, 22; Allan Sollano, 36; Roy Noynay, 52, nga sakay sa F/B Jordan.
Ang mga nasikop pulos taga Mahawak, Medellin nga sakay sa motorbanca nga gipanag-iya ni Jordan Villacampa.
Si Police Officer 3 Ressan Moralde, desk officer sa Daanbantayan Police Station miingon nga nasigpatan sa seaborne patrol sa kapolisan niadtong Biyernes sa kaadlawon ang grupo diha sa isla sa De Gato nga usa ka Marine Protected Area.
Gawas nga anaa kini nanagat sa usa ka protected area, migamit pa g’yud sila og “superlights” aron sa pagpaapong sa isda ug pukot nga pino og mata hinungdan nga ila kining gisita kay gidili kini sa balaod.
Tungod sa illegal nga paagi sa ilang pagpanagat giguyod sa mga polis padung sa baybayon ang motorbanca ug gidala sa buhatan sa kapolisan ang mga dinakpan.
Gikompiskar ang motorbanca ug ilang mga gamit sa panagat ug ang 40 ka banyera nga tuloy nga mobalor og P35 mil.
Nasayran nga nakagawas ra sab diay dayon ang mga mananagat tungod kay nibayad sila sa ilang kalapasan sa municipal ordinance. (BANAT NEWS)