CEBU, Philippines - Gisaway ni Talisay City Vice Mayor Romeo Villarante si Mayor Johnny de los Reyes tungod sa iyang pamahayag nga dili angay sikopon ang nalambigit sa ilegal nga swertres tungod kay luoy ang mga nanginabuhi.
Matud ni Villarante nga iresponsable kaayo ang pamahayag ni JVR kay siya amahan sa siyudad ug gitahasan nga mopatuman sa tanang legal nga kalihokan ug dili sa ilegal.
Sigun pa ni Villarante nga ang gibuhat sa mayor mao lang ang pagpamolitika ug ang iyang pamahayag ang nakapaduda sab nga didto ba kini nakapusta sa ilegal nga kalihukan.
Si De los Reyes sa miaging adlaw nipahibaw nga iyang mandoan si Supt. Germano Mallari, hepe sa kapolisan sa Talisay, nga hunongon ang pagpanakop sa mga nalambigit sa ilegal nga swertres kun di sila makahatag og desenteng trabaho sa mga nanginabuhi niini.
Apan si Villarante mitawag sab ni Mallari ug giawhag ang polis nga ipadayon gyud ang ilang kampanya batok sa ilegal nga sugal.
Niadtong miaging adlaw nasikop sa kapolisan ang unom ka tawo nga tigbantay sa ilegal swertres outlets sa Barangay Poblacion, Tabunok, Bulacao, Dumlog, Mojon ug San Isidro. (Gabriel Bonjoc/RUB)(BANAT NEWS)