CEBU, Philippines – Ipakita ang industriya sa pagpanghimo og silhig lanot sa barangay Paknaan, dakbayan sa Mandaue atol sa Asia-Pacific Economic Cooperation (APEC) Meetings karong Agosto 22 hangtud Oktubre 14.
Kini ang nasayran atol sa APEC orientation nga gitambungan sa mga barangay kapitan sa niagi’ng adlaw ug sa press conference kagahapon sa buntag sa Cebu Northwinds Hotel sa Lahug, dakbayan sa Sugbo.
Ang Paknaan mao’y dapit sa dakbayan sa Mandaue nga gibantug sa produkto sa silhig gikan sa lanot sa palwa sa buli sa nasud.
Si Paknaan barangay kapitan Malaquias Soco nibutyag nga ang naumol nga kooperatiba sa pagpanghimo og silhig ang nakadawat na og nagkalainlain nga hinabang ug nakapahimulos na usab sa soft loan program sa kagamhanan.
Sa niagi’ng buwan, ang kagamhanan pinaagi sa City Cooperative Development Office nakadawat og P200,000 nga hinabang gikan sa walo ka kompaniya sa tuyo nga mapalambo ang mao’ng panginabuhian.
Si Ibabao Estancia barangay kapitan Carmelino del Mar ug bise presidente sa Liga ng mga Barangay sa dakbayan niingon nga dili lang ang silhig ang hatagan og higayun nga mapresentar sa APEC kun dili ang uban pa’ng produkto sa dakbayan nga naglakip sa bibingka, budbod, tagaktak, masareal ug uban pa. – /GMR) (BANAT NEWS)