CEBU, Philippines - Unang adlaw sa pagpatuman sa bag-ong traffic scheme sa dakbayan sa Mandaue gisugat og kalibog sa mga motorista, kini bisan pa man sa pangangkon sa opisyal sa Traffic Enforcement Agency of Mandaue (TEAM) nga hapsay ug nakapaluag kini sa trapiko.
Apan alang ni Rey Sugayri, usa ka PUJ driver nga nagbiyahian gikan sa Mandaue paingon sa Liloan, nakapalibog kanila ang gipatumang one way traffic scheme sa siyudad.
Matud niya wala na sila masayod kun asa manguha og pasahero tungod kay giusab ang mga rota ug apektado ang ilang panginabuhian.
Apan si Glenn Antigua, acting chief sa TEAM kinsa unang nangangkong niluag ang dagan sa trapiko tungod niini, nanghangyo karon nga patas-an pa sa mga motorista ang pailob kay aduna pa silay gihimong adjustment karong mga panahona.
Giangkon niya nga di perpekto ang unang adlaw sa pagpatuman sa traffic scheme sa dakbayan ug ilaha karon gitan-aw kun asa ang himuong loading ug unloading areas sa mga pasahero. Ang one way traffic scheme ipatuman sulod sa 60 ka adlaw nga kun mauyonan ni Mayor Jonas Cortes posibleng himuon na kining permanente. (BANAT NEWS)