CEBU, Philippines – Usa ka salesman sa sigarilyo ang nabiktima sa pagpanulis samtang naghatud og mga produkto diha sa A. Soriano Avenue atbang sa Queen City Memorial Garden sa Barangay Carreta ning dakbayan sa Sugbo.
Ang mga biktima naila nga sila si Alvin Ventero, 29, salesman sa Mighty Corporation nga taga Tipolo dakbayan sa Mandaue kauban ang iyang drayber nga si Flory Romeo, 35, taga Sto Niño, barangay Quiot ning dakbayan.
Sumala pa sa mga biktima ngadto sa Mabolo Police Station kalit miabot ang duha ka armadong lalaki ug gipangtionan sila og armas ug gipasulod sa van ug gikuha ang ilang halin nga gibanabanang P30 mil hangtod P50 mil.
Apan ang hepe sa Mabolo Police nga si Senior Inspector Peter Hartzel Bellido nga nahinabi sa Banat News duna’y pagduda sa maong hitabo.
Sumala pa ni Bellido nga atol sa ilang pag-follow up sa maong lugar wala’y nabantayan ang mga nagpuyo sa maong lugar nga duna’y tulis nga nahitabo sa maong dapit.
Dugang nakapaduda kanila mao ang managlahing pamahayag sa duha dihang gibuwag sila nga gikuhaan og pamahayag. – /EIM) (BANAT NEWS)