CEBU, Philippines - Ang hepe sa Cebu Provincial Anti-Illegal Fishing Task Force (CPAIFTF) miluwat sa katungdanan tungod sa problema sa iyang panglawas.
Si Gobernador Hilario Davide III miingon nga mihatag na og resignation letter si retired colonel Romeo Tapayan nga nagpasabot nga kutob na lang siya karong Marso 1.
Matud ni Davide nga tulo na ka tuig si Tapayan nga miserbisyo sa Kapitolyo nga nagsugod pagka consultant ug nakontento siya sa serbisyo niini.
Gawas sa problema sa panglawas giingong atimanon usab ni Tapayan ang ilang kaugalingong negosyo.
Matud ni Davide nga dili angay’ng ikabalaka ang pagluwat ni Tapayan sa serbisyo kay ang Provincial Environmental and Natural Resources Office (PENRO) maoy modumala task force kay ubos man kini sa iyang pagsuperbisar.
Ang labing ulahi nga operasyon sa CPAIFTF ubos ni Tapayan mao ang pag-imbargo nila sa sobra 50 ka sako’ng nagkalain-laing klase sa endangered species nga kinhason sa lungsod sa Liloan.
Ang mga kinhason giingong gikan sa Masbate ug gidunggo sa lungsod sa Daanbantayan ug gitumod dinhi sa Sugbo. Laing operasyon sa CPAIFTF mao ang pagkasikop sa 54 ka mananagat nga taga Danao nga mipahigayon og ilegal nga pangisda sa kadagatan sa Barangay Poblacion, dakbayan sa Talisay.
Ang maong mga operasyon sa CPAIFTF nahimo sa milabay’ng tuig inabagan sa Naval Forces Central (NAVFORCEN). (BANAT NEWS)