CEBU, Philippines - Mikabat sa P20 milyones ang gahin sa kagamhanan sa probinsiya ug nasudno’ng gobiyerno sa katukuran sa Crisis Center for Women and Children sa Sudlon, Lahug, dakbayan sa Sugbo.
Kagahapon sa buntag gipahigayun ang groundbreaking sa nahisgutang proyekto.
Si Gob. Hilario Davide III namulong nga ang maong proyekto dugay-dugay na’ng gipaabot ni Bise Gob. Agnes Magpale ug karon nahatagan na gyud og katumanan.
Si Magpale ang chairman sa Provincial Women’s Commission ug Provincial Commission for the Welfare of Children.
Gibutyag ni Davide nga ang maong crisis center alang sa kababayen-an ug kabataan nga biktima sa pang-abuso.
Ang proyekto gikatakda nga mahuman karong Hulyo nga may 40 ka kwarto.
Sa laing bahin, si Magpale nagkanayun nga dunay livelihood center ang maong proyekto aron matudloan og panginabuhian ang kababayen-an nga biktima sa pangabuso.
Gibutyag ni Magpale nga personal siya’ng niadto sa Manila ug nakigkita kang Department of Social Welfare and Development (DSWD) Secretary Dinky Soliman diin siya nangayo og tabang alang sa maong proyekto.
Ang mga staff sa crisis center langkuban sa mga doktor, social worker ug house parents. (BANAT NEWS)