CEBU, Philippines - Gipadayag ni Cebu City Mayor Michael Rama nga dili anginon sa problema sa Asian College of Technology (ACT) ang mga scholars sa kagamhanan sa dakbayan nga naa sa maong tunghaan.
Ang pamahayag ni Rama giluwatan nunot sa kamandoan sa buhatan sa Ombudsman nga ipatangtang si Kong. Rodrigo Abellanosa sa katungdanan.
“If there are some technicalities and legalities to a person, let us not deprive the students,” matud ni Rama.
Si Abellanosa gireklamo og grave misconduct tungod sa conflict of interest sa scholarship program sa siyudad diin siya nag-alagad kanhi isip konsehal.
Gipanag-iya ni Abellanosa ang ACT ug ang Asian College of Technology International Educational Foundation Incorporated nga parehong accredited sa Cebu City scholarship program.
“And if there would be scholars in that school (ACT) and our obligation we have to take regardless who is the head,” matud ni Rama.
Matud ni Konsehal Gerry Carillo nga adunay mga tinun-an nga niduol sa iyang buhatan nga wala ma-release ang ilang Transcript of Record tungod sa kaso.
May kolektahonon pa sa kagamhanan sa dakbayan sa Sugbo nga mokabat sa P119.7 milyones ang ACT alang sa second semester sa 2011-2012 ug 2012-2013. Ubos sa maong programa, ang matag tinun-an makadawat og P10 mil matag tuig isip tuition fee ug usa ka libo nga allowance. (BANAT NEWS)