CEBU, Philippines – Usa ang patay samtang onse ang naangol sa dihang nadumbolan sa usa ka prime mover ang gisundang Fuso Canter nga dunay mga tawong sakay diha sa Marcelo Fernan Bridge sa habig sa Barangay Umapad, dakbayan sa Mandaue kagahapon sa buntag.
Ang aksidente mimugna og kapin duha ka oras nga trapiko sa lane nga padung sa Lapu-Lapu City.
Si Police Officer 3 Melvin Llones, imbestigador sa traffic division sa Mandaue City Police Office (MCPO) nagkanayon nga ang nalambigit sa aksidente mao ang usa ka Fuso Canter (YCE 513) nga gimaneho ni Armando Asentista, samtang ang prime mover (GBY 720) gimaneho ni Emeliano Quimco Jr., 22.
Matud pa ni Llones nga kritikal ang kauban nga babaye ni Asentista nga si Erlinda Caburnay diha sa front seat nga apil sa napiit.
Apan matud pa ni PO3 Ernesto Rivera sa Traffic Division sa Mandaue City Police Office kagabii, nakabsan gyud sa kinabuhi si Caburnay diha sa tambalanan.
Ang mga nangaangol nga sakay ni Asentista pulos sa taga Sitio Kalubihan, Barangay Banawa, dakbayan sa Sugbo.
Matud pa ni Llones gikan sa dakbayan sa Mandaue ang duha ka sakyanan ug nag-una ang mga biktima padulong sa dakbayan sa Lapu-Lapu.
Sumala pa ni Llones pag-abot sa maong taytayan misuway og overtake si Quimco kang Asentista apan nasangit kini sa luyo sa maong gamay nga trak hinungdan nga natumba sa wala ug nayabo ang mga sakay niini.
Gihatod sa Mactan Doctors Hospital ang ubang mga biktima ug ang uban gihatod sa Mandaue City Hospital.
Si Quimco apil sa mga naangol ug nalandig sa Vicente Sotto Memorial Medical Center. – /EIM) (BANAT NEWS)