CEBU, Philippines - Hugot nga gi-monitor sa Philippine Coast Guard ang paglawig sa mga barko ilabi na nga kusog ang hangin ug dagku ang mga bawod nga epekto sa bagyong Ompong.
Ang PCG sa Kabisay-an wala’y gipakanselar nga biyahe apan dunay mga barko nga boluntaryong mikanselar sa ilang biyahe.
Matud ni PCG Commander Weniel Azcuna nga lima ka barko ug tulo ka motorbanca ang wala mobiyahe. Kini mao ang MV Ocean Jet 88, MV Lite Ferry 3, MV Weesam 6, MV Lady Gaudalupe, MV Lady Charity nga paingon sa Bohol, Negros Occidental ug Ormoc.
Samtang ang mga motorbanca nga Super Sim II, MBCA Leopard ug MBCA San Isidro nga dunay biyahe paingon sa Leyte ug Cadiz City ang wala una milawig.
Hinuon bisan sa pagkanselar sa mga biyahe, base sa rekord sa Coast Guard wala’y mga pasahero nga natanggong tungod kay sayo pa lang sa buntag nihunong na sa pagpamaligya og ticket ang shipping companies nga hingtungdan.
Wala usab makadawat og report ang PCG nga may naaberiya nga mga barko gumikan sa dautang panahon. (Decemay P. Padilla/GMR)(BANAT NEWS)