CEBU, Philippines - Unom ka tawo, apil ang kanhi polis, nga maoy mibanhig ug mipatay sa hepe sa Ubay (Bohol) Police Station kaniadto’ng Sabado sa gabii napatay ‘sab sa kapolisan atol sa follow-up operation didto sa ilang tagoanan sa lungsod sa Bien-Unido, Bohol kagahapon sa buntag.
Si Chief Inspector George Caña, hepe sa Ubay Police Station, nagmaneho sa iyang Mitsubishi D’Max pick-up nga sakyanan paingon na unta nga mopauli sa ilang balay dihang gibanhigan didto sa Barangay Balintawak, Talibon, Bohol alas 7 sa gabii.
Si Senior Inspector Eduard Sanchez, hepe sa Talibon Police Station, misaysay nga adunay sakyanan nga miampad sa gisakyan ni Caña ug gipauwanan og mga bala ang opisyal sa kapolisan.
Matud pa nga gihunongan pa sa mga tawo nga mibanhig si Chief Inspector Caña ug girakrakan pag-ayo mao nga natusak-tusak sa mga bala ang iyang panagway.
Ang pagbanhig ni Caña nahitabo pipila ka adlaw human siya makadawat og hulga sa iyang kinabuhi tungod sa pagronda sa ilado’ng drug pusher didto sa lungsod sa Ubay.
“Nakadawat na siya ug ang iyang kauban og death threat human sa ilang buy-bust, basin ba og nasakitan ang mga druglord sa ilang gibuhat, tarong man gud na siya nga polis,†matod pa sa hepe sa Talibon. Si Caña maoy ikaduha nga hepe sa kapolisan sa Bohol nga gipatay sulod lang sa pipila ka buwan ang milabay. Kaniadto’ng Abril 29, si Danao (Bohol) acting police chief Noel Romagos gipatay usab sa wala hiilhi’ng mga tawo.
Pipila ka oras human nga gibanhigan si Chief Inspector Caña, ang mga sakop sa Bohol Provincial Intelligence Branch (PIB), Special Weapons and Tactics (SWAT) ug kapulisan sa Bien-Unido mihimo’g follow-up operation.
Ilang nahibaw-an nga ang mga armado’ng tawo nga suspetsado pagbanhig sa hepe sa Ubay didto mag-estar sa usa ka balay sa Playa Beach sa Barangay Puerto San Pedro, Bien-Unido.
Nahitabo ang pinusilay tali sa kapolisan ug sa mga armado’ng tawo kay giunhan ang mga polis sa pagpusil. Unom sa mga suspetsado ang napatay apan wala pa hiilhi hangtod kagabii.
Apan usa sa unom nga napatay nailhan nga kanhi polis nga si PO1 Owen Rosales, nadestino sa Guindulman Police Station. Matud pa nga si Rosales wala na motunga sa iyang duty mao nga gitaktak kini sa serbisyo.
Gawas sa unom nga napatay, adunay upat nga sakop sa grupo nga nadakpan. Sila mao si Roberto Olalo, Orlando Garcia, Paulo Avenido ug 17-anyos nga babaye.
Sigun sa pasiuna nga report, adunay mga armas ug bala nga na-recover ang kapolisan apan hangtod alas siete kagabii gikordon pa ang dapit kay himoan pa nila og crime scene investigation. (BANAT NEWS)