CEBU, Philippines - Ugma na ipahigayon ang qualifying examinations alang sa regular recruitment sa Bureau of Fire Protection (BFP) Region 7 nga ipahigayon sa Regino Mercado National High School sa Barangay Pahina Central, dakbayan sa Sugbo. Dunay kapin 100 ang mi-apply alang sa pagka Fire Officer 1 (FO1) apan 45 lang ang bakante sa maong recruitment. Kadtong makapasar sa qualifying exams mopadayon pag-undergo og neuropsychiatric exams, drug test ug agility test kon ang pagsukod sa pisikal nga kondisyon sa aplikante. Sa tanang mga aplikante good luck sa inyong eksaminasyon.
Sa pikas bahin, nabulabog kita sa usa ka sunog niadtong sayo’ng buntag sa Mayo 13 didto sa dalan Junquera diin nasunog ang Chinese Ngohiong ug pipila ka panimalay ang hingpit naugdaw.
Nagsugod ang maong sunog sa kusina sa Chinese Ngohiong gumikan sa pagkaratol sa kusinera kay iyang gisabligan og tubig ang nagkayo niini nga kawa nga dunay daghang mantika.
Pastilan no, kadaghan na kaayo nato kana mahisgoti nga sa panahon nga maka-encounter kita nga mosilaob ang atong kaha o kawa gumikan sa pagdakop sa kayo ngadto sa init nga mantika dili gayud kini nato sabligan og tubig sanglit mosamot kini pagsilaob.
Sa makausa pa, akong pahimangno sa publiko nga kun ugaling makasugat kita og susamang sitwasyon dili kita angayan nga maratol ug dapat magpabilin kita’ng kalma. Ang hustong buhaton mao ang pagpangita lang og itaklob sa maong kawa o ba kaha mokuha og panapton nga basa ug dayon taklob niini.
Alang sa mga dagkong kusina diin adunay dagko’ng kawa nga gigamit mas maayo gani nga dunay nakaandam nga baril diin dunay nakahumol nga dako’ng nuog o panapton aron sa panahon nga dunay pagsilaob dali ra nato kining matabonan.
Siguro ang tukma’ng kahibalo ug regular nga pagbansay-bansay sa mga fire safety measures dako kaayo og ikatabang aron makamao na kita sa mga husto’ng buhaton panahon nga dunay mga panghitabo nga susama sa sunog sa Chinese Ngohiong.
Sa kataposan, giawhag ang publiko pagmatngon kanunay ilabi na karong panahona diin naglagiting ang grabe’ng kainit sa panahon. Gani niadto’ng mga milabay’ng adlaw mitala kita og pinakataas nga temperatura nga miabot sa 41 degrees celcius nga kun atong subayon dili na normal ang maong kainit dinhi sa atong dapit.
Ang epekto sa grabe’ng kainit makapahimo’ng uga sa ato’ng panimalay, kabtangan , sakyanan ug sa tanan nga butang nga ma-expose sa adlaw. Ug sa maong paagi kun dunay spark o gamay nato’ng sipyat nga makamugna og kalayo dali ra unya kining makakatap ug hingpit dayon ang pagsilaob.
Busa gihangyo ang publiko nga magpabilin kita’ng magmabinantayon aron makalikay kita sa sunog.Ang inyong kabomberohan subsob ang kampanya alang sa atong mga Fire Prevention campaign aron hingpit ang publiko nga luwas sa sunog. (BANAT NEWS)