CEBU, Philippines - Kapin na sa 6,000 ka aftershocks ang natala sa Philippine Volcanology and Seismology (PHIVOLCS) human miigo sa Bohol ang magnitude 7.2 nga linog niadtong Oktubre 15, 2013 sa alas 8:12 sa buntag.
Si Robinson Jorgio, seismic observer sa PHIVOLCS-7, miingon nga ang mga paglinog nga nasinati karon sa Bohol ug sa Sugbo mga aftershocks pa kini sa maong linog.
Nanukad ang maong mga pagtay-og sa North Bohol fault nga padayon pang naglihok.
Kagahapon upat ka linog ang natala sa PHIVOLCS diin una ang magnitude 3.4 sa alas 12: 54 sa tungang gabii sa Dagohoy, Bohol.
Sunod niini ang magnitude 2.7 nga miigo sa dakbayan sa Tagbilaran sa alas 4:24 sa kaadlawon.
Mitay-og sab ang magnitude 4.0 nga linog sa samang dakbayan sa alas 11:13 kagahapon sa buntag.
Gisundan kini sa magnitude 3.3 ala-1:26 sa hapon sa maong dakbayan gihapon.
Ang maong mga paglihok sa yuta gitawag og “tectonic†ang hinungdan kun ang paglihok sa kina-uyokang bahin sa yuta ubos nga bahin sa Bohol.
Wala hinoo’y gikataho nga naangol ug nakalas sa maong mga hitabo sa linog.
Matud ni Jorgio nga dili masulti sa PHIVOLCS kun hangtud kanus-a mohunong ang pagtay-og sa yuta.
Nipahimangno hinoon si Jorgio nga padayon lang gyud nga magbantay ang katawhan aron malikay sa piligro oras nga molihok na ang yuta. (BANAT NEWS)