CEBU, Philippines - Naputol ang ulo sa kinatawo sa usa ka lalaki nga giingong gituyo niini og abis gamit ang blade ug nagkurog na kining nadiskubrehan sa mga bata sa sitio Santo Niño sa barangay Tabok, dakbayan sa Mandaue alas 12 pasado ang takna sa udto niadtong miaging adlaw.
Ang maong lalaki nga nag-edad og 46 anyos (pangalan gitago sa Banat News aron proteksyonan iyang pamilya), minyo ug nagpuyo sa maong dapit ug kasamtangan karon nga giatiman sa mga doktor sa Vicente Sotto Memorial Medical Center sa dakbayan sa Sugbo.
Ang mga silingan niini miingon nga unang namatikdan sa mga batang nagduwa ug nakabantay sa usa ka garbage bag nga daw dunay sulod nga nag-uyog-uyog maong ilaha kining gihiling ug nakugang sila nga ang maong lalaki ang sulod niini ug nagkadugo ang bilahan ug nagkurogkurog.
Dali nga gipahibalo sa mga bata ang ilang mga ginikanan nga mao usab ang mipahibalo sa asawa sa lalaki kinsa nanawag og ambulansiya sa barangay ug dali kining gihatod sa tambalanan.
Dugang pa sa mga silingan nga milakaw sa ilang panimalay ang maong lalaki nga nagdala sa garbage bag ug blade ug miadto sa kalibunan sa unahan sa ilang panimalay.
Gituohang nagsak-ob sa iyang kaugalingon ang maong lalaki gamit ang maong garbage bag ug giabis ang iyang kinatawo gamit ang blade.
Matud pa nga kapin na tuig nga nakagawas sa psychiatric ward sa VSMMC ang maong lalaki.
Si Marina Paradiang, hingkod ang panuigon nga nagtrabaho isip summon server sa barangay Tabok nga nahinabi sa Banat News miingon nga gipapangita unta sa mga doktor sa VSMMC ang kaputol sa kinatawo sa lalaki aron ibalik og sumpay.
Apan ang anak nga maoy naglubong sa naputol nga kinatawo sa iyang amahan nakalimot na sa lugar kung diin niya kini gilubong.
Matud pa ni Paradiang nga gikataho nga sa miaging mga bulan niining tuiga nga giputol usab sa maong lalaki ang iyang kumingking ug naayo na kini.(/EIM) (BANAT NEWS)