CEBU, Philippines - Pahamtangan og bug-at nga silot ang mga tawong mopatay ug moihaw og pawikan aron himoong sud-an.
Mao kini pasidaan nga gipalanog sa tigpamaba sa Department of Environment and Natural Resources (DENR)7 Ed Llamedo atol sa Association of Government Information Officer (AGIO)7 forum sa miaging adlaw.
Matud pa ni Llamedo nga di momenus sa unom ka tuig nga pagkabilanggo sa masakpang mopasipala sa pawikan. Ang pawikan usa ka matang sa isda sa kadagatan nga gipreserbar sa kagamhanan tungod sa pagnihit niini karong panahona.
Namatikdan sa mga tinugyanan sa DENR nga ang mga kan-anan sa barangay Pasil, dakbayan sa Sugbo maoy nagpasiugda sa pagluto og pawikan aron ipakaon sa mga customer niini.
Apan dihang giespiyahan sa taga DENR ang maong lugar sa migaing semana wala silay nadakpan nga namaligya og sud-an nga pawikan.
Matud ni Llamedo nga daghan silang gisukit nga mga karenderya kun namaligya ba sila og pawikan, apan ang tanan milimod.
Nasayran usab nga nagkalainlaing otoridad sa gobiyerno ang anha magyampungad sa mga kan-anan sa maong lugar tungod sa kalamian kaonon sa unod sa pawikan.
Gumikan niini gidestinohan karon sa DENR og mga mananakop ang maong mga kan-anan aron sa pagsikop kutob sa mga kusinero o kaha tag-iya sa kan-anan nga mamatud-an nga namaligya og sud-an nga pawikan.
Matud pa ni Llamedo nga dili lamang ang lugar sa Pasil maoy ilang gimonitor kundi bisan sa nagkalainlaing lugar sa Metro Cebu, mga kalungsoran ug kabarangayan sa tibuok lalawigan nga nasayrang gihimong usa sa ilang mga potahe ang sud-an nga pawikan.
Sa samang higayon giawhag ni Llamedo ang publiko sa pagtaho sa ilang buhatan kutob sa masayran nilang namaligya og linuto nga pawikan. (/WC (BANAT NEWS)