CEBU, Philippines - Naangol ang usa ka ulitawo human masabak sa saag nga bala ang bitiis niini gikan sa wala hiilhing mga tawo nga nagpinusilay samtang nagsakay sa ilang mga motorsiklo didto sa barangay Polpogan, lungsod sa Consolacion sa miaging gabii. Si PO2 Jovanni Mabano sa kapolisan sa maong lungsod miila sa biktima nga mao si Richard Tacoloy, 24, ulitawo ug nagpuyo sa maong dapit.
Matud pa ni PO2 Mabano nga ilang nadawat ang maong kasayuran gikan sa inahan sa biktima nga mitaho sa ilang buhatan ug mitug-an nga ang biktima didto sa sulod sa ilang balay dihang milanog ang mga botoboto sa armas.
Dugang pa niya nga ang mga backrider nga nagsakay sa duha ka motorsiklo maoy nagbinayloay sa mga bala.
Apan imbis may maigo kanila, ang biktima na hinuon nga didto ra sa sulod sa ilang balay maoy nasabak sa bala.
Si PO2 Mabano miingon nga ang biktima kasamtangang nagpaalim sa iyang samad sa tambalanan samtang ang kapolisan padayon pa nga naniid sa mga nakapusil sa biktima. (BANAT NEWS)