CEBU, Philippines - Girekomendar ni Sr. Supt. Rey Lyndon Lawas sa Lapulapu City Police Office ang pagpahugot pa sa sistema sa seguridad nga gipatuman sa sulod ug gawas sa Birhen sa Regla Shrine diha sa dakbayan sa Lapulapu human masutang daghang buslot sa ilang seguridad nga nakaingon sa pagkakawat sa kapin usa ka gatos ka alahas sa ilang patron.
Gawas pa niini gikatakdang pakuhaan og fingerprints ang tanang mga empleyado ug nagtrabaho sa maong parokya lakip na ang kaparian ug mga madre aron pagklaro.
Kini ang nasayran sa Banat News kang Senior Inspector Christian Torres sa Theft and Robbery Section (TRS).
Naglakip na niini mao sila si Padre Agustin Pulong ug mga kaubang kaparian,utility workers, mga Parish Security Guard (PSG) ug uban gawas lamang sa kura paroko nga si Padre Jimmy Duero kinsa didto sa kaulohan dihang nahitabo ang pagpangawat. Gitinguha usab niya nga human sa fingerprint posibleng gamitan pa og polygraphic test kun gikinahanglan.
Sa pagkakaron pabiling gituohan sa kapolisan nga inside job ang nahitabo tungod kay walay nakitang timailhang gipugos og abli ang sudlanan sa estante sa Mahal nga Birhen sa Regla nga diin gibutang ang mga alahas.
Sumala pa nga mga kwintas, mga singsing ug mga bracelets ang nahanaw nga pulos ginama sa bulawan.
Samtang mopatawag og laing technician nga eksperto sa closed-circuit television camera (CCTV) ang mga imbestigador sa Theft and Robbery Section aron tan-awon kung gubaon ba gyud ang maong ekipo.
Ang maong CCTV gituohang dako og ikatabang sa imbestigasyon kung masuta nga dili kini guba. Nasayran nga wala magkaparehas ang tubag sa technician sa simbahan ug sa usa sa mga pari kabahin sa kondisyon sa maong gamit. (/EIM) (BANAT NEWS)