CEBU, Philippines - Ang Philippine Institute of Volcanology and Seismology (Phivolcs) nagpahigayon og ground shaking assessment sa tibuok siyudad sa Sugbo ug sa Talisay City pinaagi sa pagbutang og seismic devices nga mosusi sa mga lugar nga humok ug mouyog ang yuta.
Kini gisugdan kagahapon diha sa Fuente Osmeña Circle, mga barangay sa Bulacao, Basak Pardo, Labangon, Sambag Uno ug Cogon Ramos.
Si Dr. Rhomel Grutas kauban ang laing lima ka Phivolcs personnel magbutang og unom ka seismic devices sa maong mga lugar sa syudad kada adlaw hangtod Enero 21 karong tuiga.
Matod ni Cebu City Councilor Dave Tumulak, makatabang kini sa mga negosyante ug mga molupyo aron masiguro nilang luwas ang lugar diin sila magtukod og imprastraktura.
“Para sad makahatag og giya sa atong katawhan nga makasabot sila nga kanang ilang gipuy-an humukon na, nga kun adunay mga linog mao na ang kusog kaayong pagtay-og,†matud ni Tumulak.
Giklaro hinuon niya nga kadtong dapit nga mouyog o lihok ang yuta wala magpasabot nga di na matukoran og edipisyo, makatabang ang maong ekipo paghatag og giya sa mga engineers aron mas palig-unon pa ang ilang desinyo. (BANAT NEWS)