CEBU, Philippines - Patay ang usa ka polis human ang iyang gisakyang motorsiklo aksidenteng nabanggaan sa usa ka Isuzu double cab truck nga dunay kargang mga baboy niadtong Lunes sa alas 11:45 sa gabii diha sa Cebu South Coastal Road habig sa barangay San Isidro, dakbayan sa Talisay.
Ang biktima mao si PO1 Philip Padron, taga Sunrise Village, sa barangay Pardo, dakbayan sa Sugbo apan naa na kini magpuyo sa barangay Dumlog, dakbayan sa Talisay.
Si Padron nadestino sa San Nicolas Police Station sa Cebu City Police Office (CCPO) ug padung na pauli nianang naaksidente.
Samtang ang drayber sa truck nga nagtangag sa plakang GJF-776 mao si Edwin Alga nagtingkagol sa Talisay City detention cell ug mag-atubang sa kasong reckless imprudence resulting to homicide.
Si SPO4 Cleopas Bonjo, hepe sa Talisay Traffic Division sa pakighinabi sa Banat News mibutyag nga dunay mga kargang baboy gikan sa barangay Lawaan, Talisay si Alga ug kusog kaayo ang dagan maong nadasmagan niini si Padron nga padulong na mosulod sa eskina San Isidro paingon sa Dumlog.
Matud ni Bonjoc nga nalagpot diha sa karsada si Padron ug wala na kini makaabot pang buhi ngadto sa Talisay City District Hospital.
Giingong ang motorsiklo sa polis napasok kini ilawom sa truck ug naguroy mga 20 metros ang gilay-on una pa mohunong ang nahisgutang trak. (BANAT NEWS)