Tungod sa kakulang sa kahibalo o kaha wala lang hatagi og pagpakabana, ang pagdumala sa husto o angay nga kaonon, mosangpot gyud ngadto sa kadaut ang kahimsog sa panglawas. Maoy na lay naamgohan, may gimulo na nga panakit.
Sama ning arthritis, mahasol ang atong gimbuhaton. Dili kita katarong sa paglihok. Kay nag-aguroy sa hilabihang kasakit sa mga apektadong joints o lutahan sa kabukogan. Aron paghupay o paglikay, sulaye ning mga remedyo:
Kaon kanunay og isda, maka-duha o maka-tulo sa semana, sama sa tuna, marlin, mackerel, sardinas ug ubang klase. Mas maayo ang lagum og unod kay mas daghan ang nutriyens sa fat kay sa putig unod. Pag-anad sa tinola kay sa prito.
Kun magluto ayaw daghana sa sabaw ug ayaw sad padugaya sa kalayo. Kuhai sa panit, aron di mokibra ang anaa ining omega-3 fatty acids, nga maoy mosanta o mopaalibyo sa panghuboy sa lutahan nga maoy nakapasakit.
Kaon sad og utan ug mga prutas, ilabi na sa pinya, grapes, saging ug avocados.
Sinangag mani, init-init pa, butangi’g olive oil.
Mushroom o salad sa ohong. Tanang kaonon pwede butangan o saburan og pinulbos nga flax seed.
Kaon og mga lamas. Kun wa kay butbot o almoranas, pagtumar og 3 ka buok pulang sili kulikot o red pepper, buntag-hapon sa di pa mokaon.
Inom og linaga sa luy-a o ginger tea. Pagkilaw sa halang lamas makaalibyo sa arthritis.
Magpa-reflex o accupressure o foot reflexology, kada semana depende sa sitwasyon sa gipamati mo.
Mag-ehersisyo’g lakawlakaw nga komportable ka hangtud maanad ka bisag 30 mins. ka lima ka beses sa semana.