CEBU, Philippines - Personal nga tambongan ni Lapulapu City Mayor Paz Radaza ang pagsaulog sa ika-100 ka tuig nga natawhan sa usa ka senior citizen dala ang surpresa niini sa maong Oponganon sa balay niini sa barangay Babag 1 karong adlaw.
Si Ciriaca Tampus Dungog, magsaulog sa iyang sentenaryo karong adlawa maisip nga maoy labing karaang lumad sa maong barangay.
Matud pa ni Radaza ang maong kalihukan tipik sa gipatumang programa sa siyudad alang sa mga senior citizens sa dakbayan nga motunol og birthday cakes sa pagsaulog sa ilang adlaw’ng natawhan. Espesyal lamang si Dungog gumikan kay usa na kini ka sentenaryo.
Gawas sa birthday cake gikatahong gastohan usab sa mayor ang kombira ni Dungog karong adlawa.
Ang pamilyang Dungog ilabi na ni Ceriaca mipadayag pagkasayod sa plano sa mayor og dakong pasalamat sa paghatag og pagtagad sa kagamhanang lokal sa iyang adlaw’ng natawhan. - BANAT NEWS