CEBU, Philippines - Nadala sa duha ka armadong lalaki ang tibuok halin gikan sa usa ka panaderiya nga gitulis niini didto sa dalan A.C. Cortes sa barangay Looc, dakbayan sa Mandaue sa miaging kaadlawon.
Ang gitulis mao ang Lix Bakeshop nga gipanag-iya ni Nene Batiquin ug gibantayan sa duha ka mga tindera nga sila si Jenelyn Armenion, 23, ug Shoney Marianito, 18, nga nagpuyo sa sitio Pokang, barangay Looc sa maong dakbayan.
Si SPO2 Juan Calamba sa kapolisan sa Presinto 5 sa Mandaue City Police Office (MCPO) nga nagbase sa barangay Opao nga nahinabi sa Banat News miingon nga nagpatuo nga mopalit og pan ang duha ka mga tulisan ug dihang gitunol na kanila ang pan usa kanila ang kalit nga misulod sa tindahan dayon gitionan niini ang tindera sa iyang armas de fuego uban sa pagdeklarar nga hold up.
Matud pa ni SPO2 Calamba nga gipupho sa maong tulisan ang tanang halin sa hunos ug ang duha ka mga cell phone sa duha ka tindera ug usa ka silver necklace niini.
Dugang pa ni SPO2 Calamba nga human makuha sa maong tulisan ang salapi ug mga butang sa mga biktima migawas dayon kini dayong ikyas sakay sa ilang motorsiklo.
Sa pagkakaron padayon pang gipangita sa kapolisan ang maong mga tulisan. (BANAT NEWS)