CEBU, Philippines - Usa ka babayeng mag-alanak sunod buwan ang nadakpan sa lungsod sa Consolacion uban sa kaubang babaye human sila gitumbok nga maoy responsable sa nagsunod nga pagpangawat sa duha ka balay sa duha ka subdivision sa maong lungsod ug sa dakbayan sa Mandaue niadtong Domingo ug Lunes.
Si Julilet Mangubat Layason,29, mabdos og walo ka buwan taga Talisay ug Catherine Robles Cabalda,28, taga Cebu City nadakpan ni Rafael Torres,23, nagpuyo sa Royale Cebu State Subdivision sa barangay Casili sa Consolacion.
Matud pa naabtan ni Torres ang duha nga misaka sa iyang balay nga nagpasumangil nga nangita sa usa ka ginganlan og “Sheila” dihang gitubag niyang walay nagpuyong Sheila sa ilaha nagsenenyasay ang duha ug namiya.
Diha nalang nabantayan ni Torres nga nahanaw na ang iyang duha ka cellphone ug I-Pod hinungdan nga iyaha silang gigukod apan dihang iyang gisukmatan mihimakak ang duha apan sa kadugayan nabawi niya ang iyang butang nga gitagoan ra nila hinungdan nga iyaha silang gipadakop.
Gisusi usab kung ang duha maoy responsable sa pagpangawat sa panimalay sa usa ka Briton ug kapuyong si Marivelou Perez diha sa Sto. Niño Village sa barangay Banilad sa dakbayan sa Mandaue niadtong Domingo.
Giingong nahanaw ang kwartang P4mil, laptop ug cellphone diha sa ilang balay. Dunay mga nakasaksing mitumbok nga babayeng mabdos ang ilang nakitang misulod sa maong balay sayo pa nianang adlawa. (BANAT NEWS)